![India's men's and women's teams qualify for Paris Olympics](http://media.assettype.com/metrovaartha%2F2024-05%2F12873344-abb0-474e-a1aa-4fa4472810a1%2FUntitled_1.jpg?w=480&auto=format%2Ccompress&fit=max)
ന്യൂഡല്ഹി: മൂന്ന് മലയാളികള് ഉള്പ്പെട്ട ഇന്ത്യയുടെ 4x400 മീറ്റര് റിലേയിൽ പുരുഷ -വനിതാ ടീമുകൾ ഈ വര്ഷത്തെ പാരീസ് ഒളിംപിക്സിന് യോഗ്യത നേടി. മലയാളികളായ മുഹമ്മദ് അനസ് യഹിയ, അമോജ് ജേക്കബ്, മുഹമ്മദ് അജ്മൽ എന്നിവര്ക്ക് പുറമെ തമിഴ്നാടിന്റെ ആരോഗ്യ രാജീവും ഉള്പ്പെട്ട പുരുഷ ടീം ആണ് യോഗ്യത നേടിയത്. 3 മിനിറ്റ് 3.23 സെക്കന്ഡിൽ ഫിനിഷ് ചെയ്താണ് ഇന്ത്യൻ പുരുഷ റിലേ ടീം പാരീസ് ഒളിംപിക്സ് യോഗ്യത ഉറപ്പാക്കിയത്. 2 മിനിറ്റ് 59.95 സെക്കന്ഡില് ഫിനിഷ് ചെയ്ത അമേരിക്കയാണ് ഒന്നാം സ്ഥാനത്ത്.
വനിതകളില് രൂപാല് ചൗധരി, എം.ആര്. പൂവമ്മ, ജ്യോതിക ശ്രി ദണ്ഡി, ശുഭ വെങ്കടേശന് എന്നിവരടങ്ങിയ സംഘമാണ് ഒളിംപിക്സ് യോഗ്യത നേടിയത്. 3 മിനിറ്റ് 29.35 സെക്കന്ഡിലാണ് വനിതാ ടീം ഫിനിഷ് ചെയ്തത്. 3 മിനിറ്റ് 28.54 സെക്കന്ഡില് ഫിനിഷ് ചെയ്ത ജമൈക്കയാണ് ഒന്നാമത്.
ജൂലൈ 26 മുതല് ഓഗസ്റ്റ് 11വരെ പാരീസിലാണ് ഒളിംപിക്സ്. റിലേയിലെ പുരുഷ-വനിതാ ടീമുകൾ യോഗ്യത ഉറപ്പാക്കിയതോടെ പാരീസ് ഒളിംപിക്സിൽ മത്സരിക്കാനുള്ള ഇന്ത്യൻ ട്രാക്ക് ആന്ഡ് ഫീല്ഡ് താരങ്ങളുടെ എണ്ണം 19 ആയി ഉയർന്നു.