ഹോവ് (ഇംഗ്ലണ്ട്): ഓസ്ട്രേലിയയുടെ സ്റ്റാർ ബാറ്റ്സ്മാൻ സ്റ്റീവൻ സ്മിത്തും ഇന്ത്യയുടെ ടെസ്റ്റ് സ്പെഷ്യലിസ്റ്റ് ചേതേശ്വർ പൂജാരയും ഇനി ടീം മേറ്റ്സ്. കൗണ്ടി ക്രിക്കറ്റിൽ അരങ്ങേറ്റം കുറിക്കാനൊരുങ്ങുന്ന സ്മിത്ത് കളിക്കാൻ പോകുന്നത് പൂജാരയുടെ ടീമായ സസ്കിലാണ്. ഈ സീസണിൽ സസ്ക്സിന്‍റെ ക്യാപ്റ്റൻ കൂടിയാണ് പൂജാര.
ലോക ടെസ്റ്റ് ചാംപ്യൻഷിപ്പ് ഫൈനലിൽ ഇന്ത്യയും ഓസ്ട്രേലിയയും ഇംഗ്ലണ്ടിൽ വച്ച് ഏറ്റുമുട്ടാനിരിക്കെയാണ് ഇരു ടീമുകളിലെയും ഓരോ പ്രധാന ബാറ്റ്സ്മാൻമാർ ഒരേ ടീമിൽ കളിക്കാൻ പോകുന്നത്. മൂന്നു ചതുർദിന മത്സരങ്ങളിൽ ഇവർ ഒരുമിച്ചുണ്ടാകുമെന്നാണ് പ്രതീക്ഷിക്കുന്നത്.
ടെസ്റ്റ് ചാംപ്യൻഷിപ്പ് ഫൈനലിനു മുന്നോടിയായി ഒരേ ടീമിൽ കളിക്കുമ്പോൾ പൂജാരയെ കൂടുതൽ അടുത്തറിയാൻ കഴിയുമെന്നാണ് പ്രതീക്ഷിക്കുന്നതെന്ന് സ്മിത്ത്.
